Top 10 Hair Care Secrets You Need to Steal from Around the World!

سائنس دانوں کا خیال ہے کہ سب سے اچھے بال چینی باشندوں کے ہوتے ہیں۔ حقیقت بھی یہی ہے کہ چینیوں کے بال کبھی نہیں جھڑتے اس کی وجہ یہ ہے کہ چینی وٹامنز بی قسم کی غذا اپنے معمول میں شامل کرتے ہیں۔

چینیوں کی خوراک میں عام طور پر مچھلی، لوبیا سبزیاں ابلی ہوئی ترکاری اور بغیر پالش چاول ہوتا ہے۔ لہذا ضروری بات یہ ہے کہ بالوں کی افزائش قوی اور مضبوط بنانے میں حیاتین ب ،معدنی نمک اور آیوڈین کی بڑی اہمیت ہے۔

بال کیوں گرتے ہیں؟

غیر معیاری صابن اور شیمپو کا استعمال بھی بالوں کے گرنے کا سبب بن سکتا ہے۔ تھائی رائیڈ گلینڈ کی کارکردگی میں کمی وزیادتی بھی بالوں کے گرنے کا سبب بنتی ہے اور غدود کے علاج سے بال دوبارہ اُگنے شروع ہو جاتے ہیں۔

جہاں تک بالوں کے مستقل گرنے اور گنجے پن کا تعلق ہے یہ صرف اس صورت میں واقع ہوتا ہے جب بالوں کی افزائش والا فولیکل بال مردہ ہو جائے یا پھر سر کے اوپر ایسا زخم یا چوٹ لگے کہ اس حصے میں یہ مادہ بالکل ختم ہو جائے ۔

بعض اوقات جسم میں ایسے کیمیائی مادے پیدا ہو جاتے ہیں جو اس مادے کو وقت سے پہلے ختم کر کے گنجے پن کا سبب بن جاتے ہیں۔ بالوں کی خوبصورتی برقرار رکھنے کیلئے مختلف ٹوٹکوں سے مدد لی جاسکتی ہے جو مندرجہ ذیل ہیں۔

سفید بالوں کو سیاہ کرنے کا نسخہ

آپ روزانہ پابندی سے چھاچھ کا استعمال کریں۔ بلغاریہ میں سفید بالوں والے لوگ بہت کم نظر آتے ہیں یہاں کے اسی سالہ ضعیف العمر لوگ بھی چھاچھ خوب شوق سے پیتے ہیں حتی کہ چھاچھ کو یہاں قومی غذا کے طور پر اہمیت حاصل ہے اسی لیے یہاں کے باشندوں کے بال سیاہ اور مضبوط رہتے ہیں۔

چھاچھ کو اپنی روزانہ کی غذا میں شامل کر لینے سے یہ آپ کے بالوں کے لیے ٹانک کا کام کرے گا اگر آپ اس کو مستقل استعمال کریں گے تو گویا یہ بالوں کا بیمہ کروالینے کے مترادف ہے۔ چھاچھ کو غذا کے علاوہ بالوں کو دھونے کے لئے بھی استعمال کریں۔ اس کا طریقہ یہ ہے کہ آپ سات یا آٹھ کری پتے لیں۔

انہیں پیس کر چھاچھ میں ملائیں۔ اب اسے اپنے بالوں اور جڑوں پر لگا ئیں ۔ 30 منٹ بعد بالوں کو اچھی طرح دھو لیں۔ اس کے استعمال سے آپ کے بال آہستہ آہستہ سیاہ ہو جائیں گے۔ اس کے علاوہ بالوں کو سیاہ کرنے کے لئے دوسرا نسخہ یہ ہے کہ مٹھی بھر خشک آملے کسی لوہے کے برتن میں ڈال کر اس میں پانی ڈالیں۔ ایک دن تک بھیگے رہیں دوسرے دن اس پانی سے سر دھو ئیں ۔

بال ملائم کرنے کی ترکیب

نہانے سے پہلے بالوں میں تیل لگانے سے بال نرم و ملائم ہو جاتے ہیں۔ اس کے لئے نہانے سے دو گھنٹے پہلے بالوں میں تیل لگانا چاہیے۔ بالوں کی سفیدی سے بچاؤ کے لئے سیکا کائی ، ماش کی دال اور میتھی باریک چٹنی کی طرح پیس لیں اور اس سے سردھوئیے ۔ اس نسخے سے بال جھڑ نے ختم اورسفید ہونے بند ہو جائیں گے۔

بالوں میں چمک اور مضبوطی

بالوں میں چمک پیدا کرنے کے لئے انہیں دار چینی کی چائے سے دھوئیں۔ زیتون کا تیل بھی بالوں کے لئے بہت مفید ہے لیکن بہتر ہے کہ زیتون کے تیل کو سرد موسم میں استعمال کیا جائے گرمیوں میں اس کا نہیں کرنا چاہیے۔

مہندی کا استعمال

ایک کپ مہندی پانی میں گھول کر اس میں آدھے لیموں کا رس ملائیں اور چار لونگ پیس کر شامل کریں، پھر انڈے کی زردی اور دار چینی کا ایک ٹکڑا پیس کر ملائیں اور مہندی کو دو گھنٹوں کے لئے ڈھانپ کر رکھ دیں۔ دو گھنٹے بعد سر میں اچھی طرح جڑوں تک لگائیں۔ دو سے تین گھنٹے بعد تازے پانی سے سر دھو کر کسی اچھے ہربل شیمپو سے سر دھو لیں۔ لیکن یہ عمل مہینہ میں صرف ایک بار کریں۔

گنجا پن روکنے کیلئے

لیموں کے رس میں پسا ہوا آملہ ملا کر سر پر مالش کریں پھر سر دھو لیں۔ لیموں کے بیج پیس کر روزانہ گنج پن پر لیپ کریں پھر آملہ کے پانی سے سر دھولیں ۔ اس کے علاوہ خالص کسٹرائل رات کو ملیں۔ اپنی غذا میں ایک مولی روزانہ شامل کریں۔

مولی کا پانی نکال کر گنج پر ملیں اس سے بال آجاتے ہیں۔ برگد کی داڑھی خشک کر کے سفوف بنا کر ناریل کے تیل میں ڈال کر رکھ دیں۔ پندرہ دن بعد تیل لگانا شروع کریں تو بال گرنا بند ہو جائیں گے۔

بہترین کنڈیشنر

تھوڑی سی مہندی میں تیل کا ایک بڑا چمچ ملائیں، پھر دودھ میں گھولیں جب اچھی طرح گھول لیں تو چائے کا چمچ کافی ملا کر سر میں لگا ئیں ، دو گھنٹے بعد سر دھو لیں ، بالوں میں چمک آجائے گی۔

بالوں کی حفاظت

ہر ماہ بالوں کی پھٹی ہوئی نوکیں تراش دیں ایسا کرنے سے بال لمبے ہوں گے۔ ہفتے میں ایک بار تیل کی مالش سے بال بڑھتے ہیں۔ زیتون کا تیل ، ناریل کا تیل سرسوں کا تیل ( موسم کی مناسبت سے لگا ئیں ) بالوں کیلئے بہت مفید ہے۔ گنج کیلئے ان میں سے کسی بھی تیل میں کیسٹر آئل ملا کر رات کو متاثرہ حصہ پر لگا ئیں۔

بال گھنے اور لمبے کرنے کیلئے : آملہ اور سیکا کائی ڈیڑھ کپ، میتھی کے بیج دو چمچ (لیموں استعمال کر کے چھلکے سکھائیں) لیموں کے چھلکے چارعدد ان سب چیزوں کو الگ الگ پیس کر ملا لیں اب سارے سفوف کے دو بڑےچمچ آدھ گھنٹہ تک تیزگرم پانی میں بھگو دیں پھر سر پر لگا کر خوب ملیں۔

پانچ منٹ بعد سر دھو لیں ، بال لمبے ہوں گے، گرنے بند ہو جائیں گے اور اُگنے لگیں گے۔ بالوں کی خوشنمائی اور صحت مندی کا انحصار جہاں ان کی نگہداشت پر ہے، وہاں بہت حد تک انسانی رویوں پر بھی ہے۔ آپ اگر گرم مزاج کے مالک ہیں، غصہ جلدی آجاتا ہے تو آپ کے بال جلدی گر سکتے ہیں۔ اگر چہ گرم مزاج لوگوں کے جسم پر بال بھی کثرت سے ہوتے ہیں ۔

خصوصیت یہ بھی ہے کہ جن لوگوں کے بال گھنگھریالے ہوتے ہیں ان کے بال گھنے ہوتے ہیں جو ٹھنڈے مزاج کے ہوتے ہیں ان کی کھال نازک، جسم پتلا ، دُبلا اور عموماً ان کے بال کم ہوتے ہیں۔

بالوں کی اگر شروع ہی سے اچھی طرح دیکھ بھال کی جائے تو بڑھاپے تک بالوں کی خوبصورتی برقرار رہتی ہے اور اس کا اصل رنگ بھی جلدی خراب نہیں ہوتا۔ بالوں میں چمک پیدا کرنے کیلئے انہیں دار چینی کی چائے سے دھوئیں۔ بال سردیوں کی نسبت گرمیوں میں زیادہ بڑھتے ہیں۔

اس نسبت سے دن کے مقابلے میں رات کے وقت روئیدگی زیادہ ہوتی ہے۔ گرمیاں بال بڑھانے کا موسم ہے، صبح و شام کنگھی یا برش کریں۔ صبح کے وقت خصوصیت سے یہ کام زیادہ مناسب ہے کیونکہ اس وقت نہ تو معدے کو خون کی ضرورت ہوتی ہے اور نہ دماغ کو اس طرح سونے سے پہلے کنگھی کی جائے تاکہ خشکی دُور ہو جائے اور خون کا دورانیہ تیز ہو جائے ۔